Gumwe gomvharerwa zabotswana kafire morwa kanwine marovhu unene

 

Silika sekoro kasikahagerere moruguwo, poopo mugara gonomvhura 31, ogu katundire koBotswana vana kutumbura asi Motswana kadogoro pekwareko lyaministeragona momapeu mo Venduka, konyima tupu kweyi yina kuzuvhika asi age kanwine unene marovhu.

Sihorokwa esi kasihorokere, pekwareko lyaministeragona gwavavaninkiliremo pwanare, Royal Jonah Kxao /Ui/o/oo. Ministeragona ogu katente asi sipwa sendi Galethabeng Tjikutirua gomoBotswana kayamudingwire nositambo asi ana hara kuyapapara mauzera yipo ayaguse vharerwa zaNamibia, akatunde mosirongo esi ana kara ngesi saBotswana. Nye eparu lyendi kuna lisupipike omu kadogorokere momapeu pita kongurova.

Age kanwine marovhu gomanzi nampili umbangi wokwandokotora yimo una kusanseka ngoso. Ame kuna kugazara asi age kanwine nobira noyikorwesa yoyiruru kapilire kuhaura age kanwine ngorooro tupu. Age kanwine dogoro mutjima kuhageka kurgana yimo ana kutanta ministeragona age membo lyendi. Ministeragona kakwere moutano ano sipito kasikereko nye momapeu pita, pembo.

Tjikutirua kavamugwene povili zo 21h00 konyima zehauto lyaministeragona TOYOTA. Age kavayamutere ava avazigida wombatero pangenderera nye yipo kavayamumwene asi anadogoroka.

Mukurona govaporosi Kauna Shikwambi katente asi kuna kumoneka asi Tjikutirua kahovere kukara mehauto komeho vakamugwane. Age katente asi nakufa kavamuzgidire kosipito ntani age kavamumwene asi ana korwa. Kwato ogu vana kugazarera nomfa edi. Yimo ana kutanta Shikwambi. Age simpe katente asi makonakono gona navagaturamo vatare nawa nawa asi yinke kayitwarederere dogoro konomfa.

Vekoro lyendi kavavatanterere ano makonakono govaporosi kuna kutwima.
Momukunda gwaErongo, mugara gonomvhura 34, moUIS, kavamukwete morwa age kankwewire munona siruwo oso age kuna kudana nomvakwawo mositaura nokumutwara komuramba.

Age kamutwere komuramba kumwe nokukamukwatera kononkondo amurare. Konyima zoyo mugazarerwa yiyo kadukire, yimo ana kutanta Shikwambi. Yimo ana kutanta ngoso, siruwo oso vana kutara asi yinke yina horoka, vamwe kuna kuwiza hena kosasiyona vayaturemo marapoto asi munona vana damuna vadukisire komuramba. Age kavamumwene ana mukwata kokana nokudukisira komuramba.

Vantu kavamumwene kumwe nokumutjida dogoro tavakadimuhamata. Age yiyo kavamuretere kovaporosi.
Sihohorokwa sokulifana, momukunda gwaKunene, mugara gonomvhura 44, kavamukwete morwa kukwatera kononkondo mukadona gonomvhura 15, age hena gokuvera uzaruke moutano wapita.

Mokukwama Shikwambi, mugazarerwa kurugana ndi kwakara nofarama novakurona womunona ogu karere, age kamuhundilire asi vaze kumwe mosipata, konyima zembo. Ano mugazarerwa yipo kamuhutwire ondere nokukara kumwe panyama age gahana kuyihara.

Ano apa ana kutengura membo mukurwa gwendi tamono nye asi mumbyendi ana nyata yipo katamekere kugazara asi yinke yina horoka. Ano apa nye kavamupulire, hawe age yiyo katente nayinye yina horoka.

Yimo ana kutanta Shikwambi. Modoropa zaOmuthiya, momukunda Oshikoto, mugara gonomvhura 30, kavamukwete pevango lyaKing Kauluma, vatunga vantu. Kuna kumoneka asi mugara ogu kuna kumugazarera asi kwahwa kukwatera munonakadona ogu nokumurara moyihwa.

Read full story on New Era Newspaper Namibia