Vavali kavaparukire mokuvahomokera nyime

 

Murugani pevango lyaEtosha National Park, musani ntani munafarama momukunda Oshikoto kavatumpukire mosipimpo sanyime, mosondaha zina puko.

Eyi kayikweme mokusikura vanyime vatatu kavadipagere ngombe pofarama za Kalangula, momapeu. Vanyandi ava vavali kavavakonderere mosipangero sepangero moSomeya, nourema wounene nouwoununu, momaguru, matako mawoko nokomugogo.

Ano ngesi mukaro gwawo kuna kuwapa nakauke nakauke. Simpagwa sangesi kasihorokerere pofarama zaJoseph Ehafo poyiha yonovili 10am omu vanyandi kavasikwire vanyime ava morwa kavadipagere ngombe zawo.
Vagara ava vavali kavakere erago omu kavaparukire ehomokero lyangesi, awo kuna kara Linus Titus murugani gomoministeli zekungo nsitwe,naPetrus Ndilimani , murugani pofarama zaKalangula.

Mukwawo zaTitus age Toivo Shivute, kakere nerago morwa kapi kavamuhomokerere, morwa age kazire aka rete ehauto lyawo eli kavasigire ure mokuvarera vanyime. Ndilimani kavamurundwilire kosipangero saOshakati morwa kapi vakara neyi yokuhakwisa urema owo mokuwoko. Omu navakayiminikira nokukayigusamo ndi vatere asi ure owo kuna zi ure wokuhura kupi.

Oyo kayihorokere pangenderera, siruwo oso mukwetu age kuna kukahara ehauto lyetu eli kali kere ure noku katukare.

Apa nye Shivute kazire aka rete ehauto, oso yiyo nye katutwikilire nokuvarera, nye nomusunda tupu dongandi nare tuna ligwanekere nanyime, age kakere nometa ntano ndi murongo ngoso. Makura nyime kumwe nye nokuwiza kwetu ano name makura yipo kanitamekere kuroya.

Erago yikutji yimwe kayimukwete, nye age simpe kuna kuliponda, Titus yige nye ana kutupa esanseko lyangoso age mosipangero ana kara. Makura yiyo katumukweme pepi tupu napa tuna muroyere, nare gogu ana homoka hena.
Makura mukwetu yipo kapulirenge asi name tanimono eyi ana kumona ndi hawe, makura tatumono nye age kuna kuduka kupenga penga, eyi kayitwarederere asi udigu kumuroya nye age ana handuka unene. Yikutji yipo nye kayipwirenge age nage kumwe nokuhomokerange, kumwe nokuyatoonange kokuwoko kwange korumowo.

Ano name yipo nye kanitamekere kutengwida nokuguru kwange korulyo, makura age yiyo nye kahuminenge ketama kumwe nye nokuhomoka asi ngano akwatenge pomulihu.

Name yipo nye kanimukakaterere mosingo nokuwoko kwange korumoho ano korulyo mokana, yimo ana kudiworoka ngoso Titus, ogu garugana asi mukungi yikorama ure wonomvhura 20, ogu ana kutanta asi simpagwa sina sidona unene kapi gasimona meparu lyendi nalinye.

Age katente asi ngesi sikando sauntazimwe yina kuhoroka yangesi ano yikwawo kapi garemanene. Age katanterere mukwawo asi roya, roya wahakara nosinka namesiruwo oso ana kulikondjesa nanyime.

Nye mukaro kagukere nye momudona apa karoye kwanyime, kumwe nokuyamuhma oku kuna kwaterere kuwoko kwendi. Siruwo oso hawe ame kapi nakuvhura hena kugenda. Nononkondo nado kuna kupwamo nye, nokuhundira mukwawo asi wahaligumagura, wahepa kugusa yikutji kwange.

Makura nyamwange yipo kanigusire hena yikutji nokutameka hena kuroya. Eyi kayitwarederere dogoro tumudipage, ano age kafire oku ana kambama mukwetu. Nouta nawo kauremanene.

Ano ministeragona gekungo nsitwe Tommy Nambahu, kakadingwire vagara owo kavamwene siponga kwanyime nokuvaretera nondja. Nokuvapa mukumo asi awo mapendagara,omu kavasikeme varwane kumwe nanyime.

Ose natugusa yinka nayinye, kovanyandi ava rambangako Ndilimani, ogu ana kara asi kapisi murugani goministeli zetu, nye ekaropo lyendi posihorokwa sangesi kuna kara simpagwa dona.

Ame nani uyunga novarugani vetu omu nani pura asi yinke yokuvhura kuruganako yimo ana kutanta Nambahu.
Ano murugani nye goministeli, age kayimuhorokerere moyirugana, ano veta nye ezi zakara asi kwakara kovarugani vemepangero, vahepa kugwana mauwa aga. Ose ngesi kuna kurugana tutjindje veta ezi, omu tuna kutara asi ngapi natuvatera vantu ava vana kumona kanyando ndi urema koyikorama yomowiza.

Ano noveta odo tuna kara nado kuna kugava mauwa kwava vana kara asi kuna mudipaga sikorama kapisi wokuremana. Yimo ana kugwedako ngoso Nambahu.

Read full story on New Era Newspaper Namibia